جديد الموسوعة

جاري تحميل اخر الاخبار...

السبت، 17 أكتوبر، 2015

اسرار الزواج الناجح .. هل تعرفيها ؟!





إيه هي أسرار الزواج الناجح؟!


كلنا بنستنى اللحظة ان يكون لينا بيت ونكون اسرة سعيدة مع الشخص اللى اختارناه يكون شريك حياتنا … بس فى اسرار واسباب هى اللى بتخلينا نوصل لفكرة الزواج الناجح  وبتخلى التفاهم بين الازواج يستمر والحياة تكون هادية وجميلة ونتجنب التصرفات اللى غيرنا مخلاش باله منها مع انها بسيطة جدا بس ممكن تهدم العلاقات….  جايبلكم نصائح جميلة فى الحفاظ على السعادة فى البيت …

1– الاهتمام:

احنا كبشر دايما بنقرب من الشخص اللى بيحاول انه يهتم بينا ويقدملنا الحب والاهتمام بدون مبالغة او زيادة عشان برده متكونش النتيجة عكسية و نوصل للملل او التكرار. فى تصرفات بسيطة ممكن نعملها من وقت للتاني وبيبقي ليها تأثير وبتوصل رسالة “الأهتمام” وممكن بسهولة تساعد ان احنا نسى مشاكلنا أو خناقتنا مهما كانت ايه.
من الافكار الجميلة :

– نسيب ورق صغير فى اماكن معينة فى البيت زى مراية الحمام مثلا او جنب كوباية القهوة و نكتب فبها كلمات حب بسيطة و رقيقة.

– نهتم ان كل فترة نبعت لزوجنا رسالة رقيقة وهو فى الشغل اكيد هتفرق فى يومه و مزاجه حتى لومعرفش يرد عليكى لانشغاله بس اكيد هيقدراهتمامك.

– دايما نفكر شريك حياتنا بالحاجات الحلوة اللى فيه ومميزاته لان من اكثر الحاجات اللى بتجيب مشاكل هي التركيزعلى السلبيات والعيوب فقط فى الخناقات و ده بيهدم الثقة بالنفس وبيبعدكم عن بعض. 

– نهتم بقضاء وقت مع بعض ومشاركة بعض فى اى حاجة شريكك بيحبها حتي لو كانت ماتش كورة! وطبعا لو فيه حاجات مشتركة انتم الاتنين بتحبوها يبقي افضل وافضل زي الفرجة على فيلم لطيف سوا مثلا.

– كل فترة مننساش نجيب هدية و لوبسيطة و مش لازم نستنى اعياد الميلاد والمناسبات.

2 – الامور المادية:

النظام اللى معظمنا اتربى عليه وهو ان الست بتاخد مصروف البيت وتنظمه طول الشهر وباقى المصاريف الراجل بينظمها و كل واحد بيركز فى حاجة لوحده و فى الاخر بيحصل مشاكل كثيرة لان التوقعات مكنتش صحيحة و ان الفلوس مش بتكفى او بيحصل مشاكل مادية و خناقات كبيرة . لازم نتعامل مع الماديات بشكل حضارى اكثر مناسب للحياة اللى عايشنها وان احنا نتكلم مع شريك حياتنا بالتفصيل عن المصاريف و احتياجات البيت وازاى ننظمها سوا مش لوحدنا و نشارك بعض فى التفكير ونشوف الحاجات الاساسية والحاجات اللى ممكن نستغنى عنها عشان نتجنب المشاكل او ان كل واحد بينظم لوحده.

3 – النقاش:

لو زوجك من النوع اللى مش بيعرف أو مش بيحب يتناقش او يتكلم لازم تحاولى معاه كذا مرة و بلاش تستلمى للامر الواقع لان النقاش ده اساس الحياة الزوجية الناجحة… كل واحد فيكم لازم يعرف يوصل افكاره للتانى بلباقة ومينفعش كل واحد يقفل على افكاره لوحده وميتكلمش فيها مع التاني لان ده هيعمل نوع من الانعزال الفكري  مابنكم وبيسبب خلافات كتيرة بعدين, حاولى تقرى كتب مساعدة او تعوديه يتكلم معاكى فى حاجات بسيطة وواحدة وواحدة هيفهم انك بتحاولى تحافظى على الحب والعلاقة والتفاهم بينكم وممكن يستجيب.

4 – البساطة و الصراحة:

بلاش لما تزعلوا من بعض فى حاجة تكتموا مشاعركم و تتجنبوا انكم تقولوا انتم اضايقتم من ايه عشان ده بيزود الطاقة السلبية فى البيت و جوا نفسكم و هتلاقوا بعد فترة انكم مش قادرين تستحملوا بعض ومش فاكرين الاسباب لانها مشاكل قديمة ومتراكمة ومتكلمتوش فيها. فى نفس الوقت مش لازم نقف عند كل مشكلة و نتناقش فيها ولازم نعود نفسنا نعدى الحاجات البسيطة زى الكلام اللى ممكن يكون بيضايق بس بيتقال فى اوقات احنا عارفين ان شريك حياتنا غصب عنه او مضغوط يعنى لازم نمشى الدنيا عشان منتعبش.

5 – تقبلوا الاختلافات:

فى ناس كثير مش بيتقبلوا عيوب اللى قدامهم و بيحاولوا يغيروهم بكل الطرق و يضغطوا عليهم و فى الاخر يتخانقوا ويبعدوا عن بعض لو التغيير ده محصلش … لازم نعرف ان من الصعب جدا حد يغير التانى الا لو التانى ده عايز يتغير من نفسه, لو شايفه ان زوجك فى عيب انتى مش قادرة تستحمليه او تتعاملى معاه حاولى تتكلمى معاه بطريقة غير مباشرة او تقترحى عليه حاجات ممكن تغير اسلوبه بلطف و زوق و تسيبيه هو يحاول مع نفسه ولازم تكونى متفاهمة و متقبلة شريك حياتك بكل عيوبه لانه اختيارك إنتي من الاساس.


_______________________________________________

إقرأ أيضا