جديد الموسوعة

جاري تحميل اخر الاخبار...

الأربعاء، 6 يوليو، 2016

8 نصايح ازاي تتصوري احلى سيلفي فى العيد .. اعرفيها !





8 نصايح ازاي تتصوري احلى سيلفي !


كلنا تقريبا بنحب الصور السيلفي وبقينا دلوقتي نتصورها في كل وقت وفي اي مكان وبنحب نشارك لحظات حياتنا او لحظاتنا مع اصحابنا والناس اللي بنحبهم بالسيلفي عشان تبقى ذكرى حلوة لينا, لكن ساعات كتير بنقع في اخطاء واحنا بناخد السيلفي من غير ما ناخد بالنا, عشان كده احنا النهاردة هنقول لكل بنات حوا نصايح ازاي تتصوري احلى سيلفي.

ياللا نعرف سوا 8 نصايح ازاي تتصوري احلى سيلفي:

1- خلي في غرض للصورة:

طبعا زي ما قولت في البداية كلنا بقينا نتصور كل وقت وفي اي مكان وبنشارك كل لحظة من حياتنا, لكن هي دي الغلطة اللي بنقع فيها مش المفروض اننا نشارك صور زيادة عن اللزوم, يعني الافضل اننا نشارك صور يكون ليها غرض معين يعني مثلا عملتي تسريحة جديدة لشعرك او لون جديد ممكن تشاركي الصورة مع اصحابك وتعرفي رايهم فيها, بتجربي مثلا لون روج جديد وحابة تشاركي صورتك بيه, او لبس جديد مثلا, او عايزة تشاركي حدث او لحظة معينة, يعني تكون الصورة ليها سبب.

2- اختاري مكان فيه اضاءة:

لما نيجي نتصور لازم نخلي بالنا من الاضاءة يعني نختار مكان في اضاءة كويسة يعني لو الصبح ممكن تقفي قدام الشباك وتخلي وشك قدام الشمس عشان تنور وشك ويطلع حلو في الصورة, ولو بالليل اختاري مكان باضاءة تكون كويسة عشان الصورة متطلعش ضلمة.

3- اختيار زاوية التصوير:

اختيار زاوية التصوير من الحاجات المهمة جدا اللي لازم ناخد بالنا منها, يعني متقربيش الكاميرا من وشك اوي وانتي بتصوري خليها بعيدة عشان الوش ميطلعش ضخم والصورة تطلع مظبوطة, ولو عايزة وشك يبان ارفع خلي الكاميرا اعلى شوية من وشك.

4- اختاري البوز الصح:

وانتي بتتصوري متخليش وشك كله باصص للكاميرا بشكل مستقيم لانه هيطلع حاد اوي في الصورة, لكن الطريقة الصح انك تلفي راسك بزاوية شوية للجنب وشك هيطلع احلى بكتير.

5- اتجنبي الدقن المزدوجة:

كتير بنقع في الغلطة دي واحنا بنصور بننزل وشنا لتحت وده بيخلي الوش يطلع اتخن وبتظهر دقن مزدوجة بسبب وضع الوش الغلط, عشان كده وانتي بتصوري ارفع وشك ومدي دقنك لقدام وخلي الكتفين لورا, وزي ما قولنا نخلي الكاميرا اعلى من الوش شوية.

6- اتجبني الـ Duck Face:

من اكتر الحاجات اللي معظم البنات تقريبا بيعملوها في الصور هو الــ Duck Face او بوز البطة, لكن الحركة دي مع تكرارها الكتير بتسبب تجاعيد في الوش, عشان كده الافضل اننا نبطل نعملها في السيلفي ونستبدلها بحركات تانية هتطلع احلى يعني ابتسامة خفيفة مثلا, او لو حابة تخلي الصورة مضحكة شوية اعملي اي حركة مضحكة بوشك كنوع من التغيير يعني ولحظة جنان شوية كده, او تبتسمي ابتسامة عريضة مع فتح الفم, يعني قدامنا اختيارات كتير للتصوير.

7- خلي في غموض بالصور:

لما نيجي نتصور مش لازم كل مره تبقى الصورة وشك كله باين فيها ممكن تعملي شوية غموض كده, يعني مثلا تصوري نص وشك بس او جزء منه, او مثلا تتصوري بضهرك وتبيني في الصورة تسريحة شعرك بس, يعني غيري مش كل مره تكون نفس اللقطات.

8- اختاري فلتر مناسب للصور:

طبعا في برامج لفلترة الصور كتير جدا حاولي تفلتري الصور بشكل مناسب وتظبطي اي عيوب فيها, يعني اقعدي جربي اكتر من فلتر وشوفي ايه انسب واحد واي واحد مطلع شكلك احلى وظابط الوان الصورة اكتر ومداري عيوب الصورة بشكل افضل.

ونصيحتنا الاخيرة لكل البنات اننا ناخد السيلفي لاننا حابين نتصور او نشارك لحظة معينة او حابين نحتفظ بيها كذكرى نفتكرها بعدين مش عشان ننزل صور وخلاص.


_______________________________________________

إقرأ أيضا