جديد الموسوعة

جاري تحميل اخر الاخبار...

السبت، 29 أبريل، 2017

اسئلة للـفوتوجرافر الخاص بيكى لازم تسأليهم قبل فرحك !





8 اسئلة للـ wedding photographer الخاص بيكى لازم تسأليهم قبل فرحك


لما بتبدأى تخططى لفرحك اللى بيعتبر من احلى الايام فى حياتك بيبقى وراكى حاجات كتيرة اوى عايزة تتظبط، من قاعة الفرح لكروت الدعوة و الفستان والاكل والمعازيم وتفاصيل تانية كتيرة ، لكن واحده من اهم التفاصيل اللى لازم تهتمى بيها هى صور فرحك ، ايه هو الستايل بتاعها و مين اللى هيصورك وياترى الصور هتطلع عامله ازاى !

ولانه مفيش اى فرصة للخطأ فى يوم زى ده … فى المقال ده اعرفى معانا 8 اسئلة للـ wedding photographer الخاص بيكى لازم تسأليهم قبل فرحك ..

8 اسئلة للـ wedding photographer الخاص بيكى لازم تسأليهم قبل فرحك

1- اسأليه هل عنده ستايل محدد ؟

اول سؤال من اسئلة للـ wedding photographer لازم تسأليه عنها هى اذا كان عنده ستايل محدد للتصوير بيشتغل بيه، يعنى لو كنتى مثلا حابة تتصورى بورتريهات لازم تتكلمى معاه وتعرفى منه اذا كان بيصور بورتيريهات ولا لا.

2- هل بيعمل re toutch للصور ؟

فى ادوات وبرامج كتيرة اوى للفوتوجرافرز بيقدروا يستخدموها دلوقتى فى صورهم ، زى الـ photo shop وغيره ، اسألى الفوتوجرافر اذا كان بيستخدم الادوات دى وبيعمل edit و re touch  للصور ولا لا.

3- خبرته قد ايه ؟

وده بيعتبر اهم سؤال لازم تساليه، قبل ما تتفقى مع الفوتوجرافر لازم تتأكدى انه عنده خبرة كويسة فى تصوير الافراح وبيعرف يتصرف، لانه الافراح دايما بيبقى كلها حركة و رقص وظروف تصويرها بتبقى صعبة، فلازم المصور يبقى محترف وفاهم هو بيعمل ايه علشان يطلعلك الصور اللى انتى عايزاها.

4- بيشتغل digital ولا بيستعمل افلام تصوير؟ 

طبعا التصوير الديجيتال هو اللى موجود دلوقتى، لكن افلام التصوير القديمة بدأت ترجع تانى برده.
لو حابة انه الفوتوجرافر يشتغل بالطريقتين ” الديجيتال وافلام التصوير” يبقى لازم تسأليه وتعرفى هو بيشتغل  بأى طريقة ، وتتأكدى انه عنده الخبرة الكافية أنه يشتغل بالطريقتين، وكمان اذا كان بيقدر يصور ابيض واسود مع الالوان.

5- الـ package بتاعته بتشمل ايه ؟

لما تختارى الفوتوجرافر، وانتى بتتفقى معاه على التفاصيل اسأليه عن كل تفاصيل الباكدج اللى هتتفقوا عليها وتدفعى فلوسها، يعنى هيصورك كام صورة، هيطبع الصور ولا كل الصور هتبقى ديجيتال بس، لو هيطبع هيعمل كام البوم ، وايه هى احجام الصور فى الطباعة ، وفى كام فوتوسيشن فى الباكدج وهكذا ، ولو هيكون فى اى تكاليف اضافية.

6- الـ package بتاعته بتديكى قد ايه وقت ؟

اتكلمى مع الـ photographer كمان عن عدد الساعات اللى هيقضيها معاكى، يعنى هيفضل معاكى طول يوم الفرح ولا قبل الفرح وبعده ، ولا اثناء الفرح بس ، وخليكى حريصة كمان انك تسأليه عن اجره لو بقى فى over time و ضرورى تتفقى معاه وقته هيبدأ الساعه كام وهينتهى الساعه كام.

7- بياخد عربون قد ايه ؟ و التكلفة كلها كام ؟

لازم تبقى عامله حسابك كمان وتسأليه لو هياخد عربون هتبقى قيمته قد ايه، وكمان التكلفة الاجمالية للباكدج اللى اتفقتوا عليه، وهل بيحتاج وقت معين قبل الفرح يظبط فيه الشغل ويشوف مكان الفرح و يدرس الاضاءة ولا لا .

8- اسأليه هو هيصورك فعلا ؟

تحسي السؤال باين غريب مش كده ! لكنه برده من اهم اسئلة للـ wedding photographer اللى لازم تسأليهاله، مهم تعرفى منه وانتى بتتفقى معاه اذا كان هو اللى هيصورك فعلا ولا هيبعت واحد من المساعدين بتوعه اللى بيشتغلوا معاه، ولو مش هو اللى هيصورك وهيبعت مساعد ليه يبقى لازم تقعدى تتكلمى معاه وتشوفه الـ portfolio الكامل لشغله علشان تقدرى تقررى ان كان شغله عاجبك ومناسب ليكى ولا لا.

____________________________________________

إقرأ أيضا