جديد الموسوعة

جاري تحميل اخر الاخبار...

الجمعة، 21 أبريل، 2017

سيدتى .. هذه العادات مضرة بجمالك لازم تبطليهم فى اسرع وقت !





10 عادات مضرة بجمالك لازم تبطليهم فى اسرع وقت


كل بنت فينا  اكيد ليها عادات معينة بتعملها زى مثلا رمى الهدوم على الكرسي بدل ما نعلقها فى الدولاب او اننا نكسل نشيل المكياج قبل ماننام او حتى اننا نفضل نشد ونلعب فى شعرنا. والعادات دى رغم انها ممكن تبان بسيطة الا انها ليها ضرر، واكتر العادات خطورة وضرر هى عادات مضرة بجمالك اللى ممكن تكونى بتعمليها وفاهمة انها صح، او مش عارفة هى  قد ايه خطر على جمالك وبشرتك وبتأذيهم كتير. وعلشان ماتحتاريش، بنات حوا هتعرفك فى المقال ده على عادات مضرة بجمالك بتعمليهم ولازم توقفيهم حالا !

10 عادات مضرة بجمالك لازم تبطليهم فى اسرع وقت ..

1-شرب السوائل بالشاليمو :

شرب السوائل والعصاير بالشاليمو من اكتر  عادات مضرة بجمالك ممكن تكونى بتعمليها، لانه الضغط المستمر للشفايف على الشاليمو اللى بنعمله لما نيجى نشرب بيها مع مرور الوقت هيسبب تكون الخطوط والتجاعيد حول منطقة الفم او اللى بيسمهوها smoker’s line. و الطريقة الوحيدة لمنع ظهور الخطوط دى من الاساس هى انك لو كنتى من الناس اللى على طول بتستخدم الشاليمو فى شرب السوايل يبقي لازم تتخلصى من العادة دى فى اقرب وقت.

2- استخدام شفرات حلاقة رخيصة :

كتير بنستسهل استخدام شفرات الحلاقة فى ازالة الشعر خصوصا لما بنبقى مستعجلين، لكن اطباء الجلد بيأكدوا انه استخدام شفرات الحلاقة بشكل مستمر، خصوصا الرخيصة منها ممكن تسبب مشاكل كبيرة للبشرة، ولو مضطرة تستخدميها يبقى لازم تحتفظي بيها فى مكان جاف بعد الاستخدام علشان تحافطى عليها من الصدأ و تقللى من فرصة انها تجمع بكتيريا او عدوى فطرية، وكمان لازم تغسليها كويس جدا بعد كل استخدام علشان كريم الحلاقة او الصابون ماينشفش بين الشفرات.

3- استخدام منتجات الشعر القديمة :

فى منتجات عناية بالشعر كتير فى حمامك و مش فاكرة حتى جيبتيها امتى؟! يبقى جه الوقت انك تتخلصى من منتجات الشعر القديمة لانه استخدامها من اكتر عادات مضرة بجمالك بشكل كبير، علشان كده امسكى كل الازايز و العلب اللى فى حمامك واقرى تاريخ صلاحيتها ولو فى اى حاجه منهم لقيتى نفسك جايباها من سنة ارميها فورا وماتستخدميهاش لانه فى الفترة دى تركيبتها بتبقى بدأت تتفكك و ده بيخلى ضرر الشامبو مثلا يبقى اكتر من نفعه.

4- النوم على نفس المخدة فترات طويلة :

النوم على نفس المخدة او يعنى ” غطاء المخدة” لفترات او ايام طويلة له ضرر كبير على بشرتك، بسبب الزيوت و الاتربة اللى بتتكون عليه حتى لو ماكونتيش شايفاها بعينيكى. الزيوت و الاتربة وبقايا المكياج بتتراكم على كيس او غطاء المخدة وتحديدا لو كنتى بتنامى ووشك جاف من غير ترطيب. التراكمات دى ممكن مع الوقت تسبب هيجان البشرة والحبوب و كمان انسداد المسام.
حاولى تغيرى غطاء المخدة مرة كل يومين او تلاتة و خليكى حريصة انك تغسلى وشك كويس قبل النوم.

5- عض الاضافر : 

العادة دى بتعتبر واحدة من اخطر العادات و اللى تقريبا مفيش بنت فينا مابتعملهاش وهى اننا بنقعد نعضعض فى ضوافرنا طول الوقت ، واحنا متوترين و واحنا زهقانين علشان كده لازم تبطلى العادة دى فورا. حاولى تهتمى بضوافرك والجلد من حواليها بشكل مستمر بأنك ترطبيها اول بأول. وممكن علشان تساعدى نفسك تتخلصى من العادة دى انك تحطى خل حوالين ضوافرك علشان يبقى طعمها لازع لما تيجى تعضيها لكن برده ده بيعتبر مش حل عملى اوى.

6- استخدام makeup كتير : 

الكونتور الزيادة و اساس المكياج الكتير والمبالغ فيه بأنك تستخدمى فاونديشن و كونسيلر و كونتور وهايلايتر  مع بعض مثلا بيعتبر كتير و مرهق جدا لوشك. علشان كده حاولى تبعدى عن استخدام كميات كبيرة من المكياج و حاولى تستخدمى المنتجات الضرورية ليكى بس، يعنى ممكن تكتفى بالفاونديشن لوحده و الفاونديشن و الكونسيلر وخلاص وبكده تظهرى بمظهر طبيعى اكتر و كمان تحافظى على صحة وجمال بشرتك من غير ما تتعبيها بمنتجات كتير.

7- التمرين وانتى حاطه مكياج : 

طبعا اثناء التمرين بنعرق و العرق مع المكياج مش mix حلو ابدا، علشان كده انك تروحى تتمرنى فى الجيم او تجرى وانتى حاطة ماكياج عادة غلط جدا  لانه مع العرق هيسيح و هيبقى شكله مش حلو ابدا. مع التمرين و الحركة المستمرة درجة حرارة الجسم بتزيد و الجسم بيحاول يعادلها بإفراز العرق اللى بيخرج من خلال المسام، فلو كنتى حاطة مكياج هيعمل طبقة هتسد المسام . و الخليط بتاع العرق + المكياج + البكتيريا = حبوب و جفاف للبشرة. علشان كده يفضل ماتروحيش تتمرنى وانتى حاطة مكياج و تستعملى سيروم مضاد للسموم على وشك قبل التمرين.

8- انك تلعبى فى شعرك :

اللعب فى الشعر وشده بيسبب هيشان الشعر و زيادة افراز فروة الرأس للزيوت اللى بتتراكم بعد كده وتسبب القشرة و الشعر الدهنى، علشان كده لو كنتى  من البنات اللى ايديهم فى شعرهم على طول يبقى لازم تتخلصى من العادة دى وافتكرى دايما، ماتشديش، ماتلمسيش او تستخدمى ادوات لتصفيف شعرك مش نضيفة.

9-  عدم استخدام سيروم البشرة : 

واحد من اكتر الاخطاء الشائعة فى الاهتمام بالبشرة هى عدم استخدام سيروم للبشرة مع الصن بلوك او كريم الترطيب، خصوصا وانه معظم منتجات الصن بلوك الموجودة فى السوق بتحمى من الشمس بنسبة 50 لـ 60 % بس، والتعرض لاشعة الشمس فوق البنفسجية مع التقدم فى السن بيسبب التجاعيد . و السر كله فى انك تستخدمى سيروم ترطيب للبشرة ومضاد للسموم قبل الصن بلوك كل يوم ، السيروم ده هيعمل طبقة حماية زيادة لبشرتك ويحافظ عليها.

10- بتعملى شعرك كتير :

تفتيح الشعر و صبغه و تلوينه و فرده و استخدام السيشوار و المكواه عليه ممكن يعملك لوك حلو لكنه بيأذى الشعر جدا و بيقلل من جماله و صحته، خصوصا مع استخدامنا للمية السخنة  اللى فيها كلور فى غسيل الشعر وكمان حرارة الشمس.

عمايل وتصفيف الشعر كتير بيسبب جفاف الشعر وتقصفه و ضعف نسيج الشعر نفسه و ده بيسبب الهيشان و التكسر، علشان كده حاولى ماتعمليش شعرك كتير و ماتسخدميش عليه الحرارة بشكل متزايد.

____________________________________________

إقرأ أيضا